Jeremiah Chapter 37
ירמיהו פרק לז
Source: https://ajew.org/reader/tanach-yirmiyahu/1/37

Segment 1
HE:
וימלך מלך צדקיהו בן יאשיהו תחת כניהו בן יהויקים אשר המליך נבוכדראצר מלך בבל בארץ יהודה:

Segment 2
HE:
ולא שמע הוא ועבדיו ועם הארץ אל דברי יהוה אשר דבר ביד ירמיהו הנביא:

Segment 3
HE:
וישלח המלך צדקיהו את יהוכל בן שלמיה ואת צפניהו בן מעשיה הכהן אל ירמיהו הנביא לאמר התפלל נא בעדנו אל יהוה אלהינו:

Segment 4
HE:
וירמיהו בא ויצא בתוך העם ולא נתנו אתו בית (הכליא) הכלוא:

Segment 5
HE:
וחיל פרעה יצא ממצרים וישמעו הכשדים הצרים על ירושלם את שמעם ויעלו מעל ירושלם: (פ)

Segment 6
HE:
ויהי דבר יהוה אל ירמיהו הנביא לאמר:

Segment 7
HE:
כה אמר יהוה אלהי ישראל כה תאמרו אל מלך יהודה השלח אתכם אלי לדרשני הנה חיל פרעה היצא לכם לעזרה שב לארצו מצרים:

Segment 8
HE:
ושבו הכשדים ונלחמו על העיר הזאת ולכדה ושרפה באש: (פ)

Segment 9
HE:
כה אמר יהוה אל תשאו נפשתיכם לאמר הלך ילכו מעלינו הכשדים כי לא ילכו:

Segment 10
HE:
כי אם הכיתם כל חיל כשדים הנלחמים אתכם ונשארו בם אנשים מדקרים איש באהלו יקומו ושרפו את העיר הזאת באש:

Segment 11
HE:
והיה בהעלות חיל הכשדים מעל ירושלם מפני חיל פרעה: (ס)

Segment 12
HE:
ויצא ירמיהו מירושלם ללכת ארץ בנימן לחלק משם בתוך העם:

Segment 13
HE:
ויהי הוא בשער בנימן ושם בעל פקדת ושמו יראייה בן שלמיה בן חנניה ויתפש את ירמיהו הנביא לאמר אל הכשדים אתה נפל:

Segment 14
HE:
ויאמר ירמיהו שקר אינני נפל על הכשדים ולא שמע אליו ויתפש יראייה בירמיהו ויבאהו אל השרים:

Segment 15
HE:
ויקצפו השרים על ירמיהו והכו אתו ונתנו אותו בית האסור בית יהונתן הספר כי אתו עשו לבית הכלא:

Segment 16
HE:
כי בא ירמיהו אל בית הבור ואל החניות וישב שם ירמיהו ימים רבים:

Segment 17
HE:
וישלח המלך צדקיהו ויקחהו וישאלהו המלך בביתו בסתר ויאמר היש דבר מאת יהוה ויאמר ירמיהו יש ויאמר ביד מלך בבל תנתן:

Segment 18
HE:
ויאמר ירמיהו אל המלך צדקיהו מה חטאתי לך ולעבדיך ולעם הזה כי נתתם אותי אל בית הכלא:

Segment 19
HE:
(ואיו) ואיה נביאיכם אשר נבאו לכם לאמר לא יבא מלך בבל עליכם ועל הארץ הזאת:

Segment 20
HE:
ועתה שמע נא אדני המלך תפל נא תחנתי לפניך ואל תשבני בית יהונתן הספר ולא אמות שם:

Segment 21
HE:
ויצוה המלך צדקיהו ויפקדו את ירמיהו בחצר המטרה ונתן לו ככר לחם ליום מחוץ האפים עד תם כל הלחם מן העיר וישב ירמיהו בחצר המטרה: