Jeremiah Chapter 39
ירמיהו פרק לט
Source: https://ajew.org/reader/tanach-yirmiyahu/1/39

Segment 1
HE:
בשנה התשעית לצדקיהו מלך יהודה בחדש העשרי בא נבוכדראצר מלך בבל וכל חילו אל ירושלם ויצרו עליה:

Segment 2
HE:
בעשתי עשרה שנה לצדקיהו בחדש הרביעי בתשעה לחדש הבקעה העיר:

Segment 3
HE:
ויבאו כל שרי מלך בבל וישבו בשער התוך נרגל שר אצר סמגר נבו שר סכים רב סריס נרגל שר אצר רב מג וכל שארית שרי מלך בבל:

Segment 4
HE:
ויהי כאשר ראם צדקיהו מלך יהודה וכל אנשי המלחמה ויברחו ויצאו לילה מן העיר דרך גן המלך בשער בין החמתים ויצא דרך הערבה:

Segment 5
HE:
וירדפו חיל כשדים אחריהם וישגו את צדקיהו בערבות ירחו ויקחו אתו ויעלהו אל נבוכדראצר מלך בבל רבלתה בארץ חמת וידבר אתו משפטים:

Segment 6
HE:
וישחט מלך בבל את בני צדקיהו ברבלה לעיניו ואת כל חרי יהודה שחט מלך בבל:

Segment 7
HE:
ואת עיני צדקיהו עור ויאסרהו בנחשתים לביא אתו בבלה:

Segment 8
HE:
ואת בית המלך ואת בית העם שרפו הכשדים באש ואת חמות ירושלם נתצו:

Segment 9
HE:
ואת יתר העם הנשארים בעיר ואת הנפלים אשר נפלו עליו ואת יתר העם הנשארים הגלה נבוזר אדן רב טבחים בבל:

Segment 10
HE:
ומן העם הדלים אשר אין להם מאומה השאיר נבוזראדן רב טבחים בארץ יהודה ויתן להם כרמים ויגבים ביום ההוא:

Segment 11
HE:
ויצו נבוכדראצר מלך בבל על ירמיהו ביד נבוזראדן רב טבחים לאמר:

Segment 12
HE:
קחנו ועיניך שים עליו ואל תעש לו מאומה רע כי (אם) כאשר ידבר אליך כן עשה עמו:

Segment 13
HE:
וישלח נבוזראדן רב טבחים ונבושזבן רב סריס ונרגל שר אצר רב מג וכל רבי מלך בבל:

Segment 14
HE:
וישלחו ויקחו את ירמיהו מחצר המטרה ויתנו אתו אל גדליהו בן אחיקם בן שפן להוצאהו אל הבית וישב בתוך העם: (ס)

Segment 15
HE:
ואל ירמיהו היה דבר יהוה בהיתו עצור בחצר המטרה לאמר:

Segment 16
HE:
הלוך ואמרת לעבד מלך הכושי לאמר כה אמר יהוה צבאות אלהי ישראל הנני (מבי) מביא את דברי אל העיר הזאת לרעה ולא לטובה והיו לפניך ביום ההוא:

Segment 17
HE:
והצלתיך ביום ההוא נאם יהוה ולא תנתן ביד האנשים אשר אתה יגור מפניהם:

Segment 18
HE:
כי מלט אמלטך ובחרב לא תפל והיתה לך נפשך לשלל כי בטחת בי נאם יהוה: (פ)