Jeremiah Chapter 49
ירמיהו פרק מט
Source: https://ajew.org/reader/tanach-yirmiyahu/1/49

Segment 1
HE:
לבני עמון כה אמר יהוה הבנים אין לישראל אם יורש אין לו מדוע ירש מלכם את גד ועמו בעריו ישב:

Segment 2
HE:
לכן הנה ימים באים נאם יהוה והשמעתי אל רבת בני עמון תרועת מלחמה והיתה לתל שממה ובנתיה באש תצתנה וירש ישראל את ירשיו אמר יהוה:

Segment 3
HE:
הילילי חשבון כי שדדה עי צעקנה בנות רבה חגרנה שקים ספדנה והתשוטטנה בגדרות כי מלכם בגולה ילך כהניו ושריו יחדיו:

Segment 4
HE:
מה תתהללי בעמקים זב עמקך הבת השובבה הבטחה באצרתיה מי יבוא אלי:

Segment 5
HE:
הנני מביא עליך פחד נאם אדני יהוה צבאות מכל סביביך ונדחתם איש לפניו ואין מקבץ לנדד:

Segment 6
HE:
ואחרי כן אשיב את שבות בני עמון נאם יהוה: (פ)

Segment 7
HE:
לאדום כה אמר יהוה צבאות האין עוד חכמה בתימן אבדה עצה מבנים נסרחה חכמתם:

Segment 8
HE:
נסו הפנו העמיקו לשבת ישבי דדן כי איד עשו הבאתי עליו עת פקדתיו:

Segment 9
HE:
אם בצרים באו לך לא ישארו עוללות אם גנבים בלילה השחיתו דים:

Segment 10
HE:
כי אני חשפתי את עשו גליתי את מסתריו ונחבה לא יוכל שדד זרעו ואחיו ושכניו ואיננו:

Segment 11
HE:
עזבה יתמיך אני אחיה ואלמנתיך עלי תבטחו: (ס)

Segment 12
HE:
כי כה אמר יהוה הנה אשר אין משפטם לשתות הכוס שתו ישתו ואתה הוא נקה תנקה לא תנקה כי שתה תשתה:

Segment 13
HE:
כי בי נשבעתי נאם יהוה כי לשמה לחרפה לחרב ולקללה תהיה בצרה וכל עריה תהיינה לחרבות עולם:

Segment 14
HE:
שמועה שמעתי מאת יהוה וציר בגוים שלוח התקבצו ובאו עליה וקומו למלחמה:

Segment 15
HE:
כי הנה קטן נתתיך בגוים בזוי באדם:

Segment 16
HE:
תפלצתך השיא אתך זדון לבך שכני בחגוי הסלע תפשי מרום גבעה כי תגביה כנשר קנך משם אורידך נאם יהוה:

Segment 17
HE:
והיתה אדום לשמה כל עבר עליה ישם וישרק על כל מכותה:

Segment 18
HE:
כמהפכת סדם ועמרה ושכניה אמר יהוה לא ישב שם איש ולא יגור בה בן אדם:

Segment 19
HE:
הנה כאריה יעלה מגאון הירדן אל נוה איתן כי ארגיעה אריצנו מעליה ומי בחור אליה אפקד כי מי כמוני ומי יעידני ומי זה רעה אשר יעמד לפני: (ס)

Segment 20
HE:
לכן שמעו עצת יהוה אשר יעץ אל אדום ומחשבותיו אשר חשב אל ישבי תימן אם לא יסחבום צעירי הצאן אם לא ישים עליהם נוהם:

Segment 21
HE:
מקול נפלם רעשה הארץ צעקה בים סוף נשמע קולה:

Segment 22
HE:
הנה כנשר יעלה וידאה ויפרש כנפיו על בצרה והיה לב גבורי אדום ביום ההוא כלב אשה מצרה: (פ)

Segment 23
HE:
לדמשק בושה חמת וארפד כי שמעה רעה שמעו נמגו בים דאגה השקט לא יוכל:

Segment 24
HE:
רפתה דמשק הפנתה לנוס ורטט החזיקה צרה וחבלים אחזתה כיולדה:

Segment 25
HE:
איך לא עזבה עיר (תהלה) תהלת קרית משושי:

Segment 26
HE:
לכן יפלו בחוריה ברחבתיה וכל אנשי המלחמה ידמו ביום ההוא נאם יהוה צבאות:

Segment 27
HE:
והצתי אש בחומת דמשק ואכלה ארמנות בן הדד: (פ)

Segment 28
HE:
לקדר ולממלכות חצור אשר הכה (נבוכדראצור) נבוכדראצר מלך בבל כה אמר יהוה קומו עלו אל קדר ושדדו את בני קדם:

Segment 29
HE:
אהליהם וצאנם יקחו יריעותיהם וכל כליהם וגמליהם ישאו להם וקראו עליהם מגור מסביב:

Segment 30
HE:
נסו נדו מאד העמיקו לשבת ישבי חצור נאם יהוה כי יעץ עליכם נבוכדראצר מלך בבל עצה וחשב (עליהם) עליכם מחשבה:

Segment 31
HE:
קומו עלו אל גוי שליו יושב לבטח נאם יהוה לא דלתים ולא בריח לו בדד ישכנו:

Segment 32
HE:
והיו גמליהם לבז והמון מקניהם לשלל וזרתים לכל רוח קצוצי פאה ומכל עבריו אביא את אידם נאם יהוה:

Segment 33
HE:
והיתה חצור למעון תנים שממה עד עולם לא ישב שם איש ולא יגור בה בן אדם: (ס)

Segment 34
HE:
אשר היה דבר יהוה אל ירמיהו הנביא אל עילם בראשית מלכות צדקיה מלך יהודה לאמר:

Segment 35
HE:
כה אמר יהוה צבאות הנני שבר את קשת עילם ראשית גבורתם:

Segment 36
HE:
והבאתי אל עילם ארבע רוחות מארבע קצות השמים וזרתים לכל הרחות האלה ולא יהיה הגוי אשר לא יבוא שם נדחי (עולם) עילם:

Segment 37
HE:
והחתתי את עילם לפני איביהם ולפני מבקשי נפשם והבאתי עליהם רעה את חרון אפי נאם יהוה ושלחתי אחריהם את החרב עד כלותי אותם:

Segment 38
HE:
ושמתי כסאי בעילם והאבדתי משם מלך ושרים נאם יהוה:

Segment 39
HE:
והיה באחרית הימים (אשוב) אשיב את (שבית) שבות עילם נאם יהוה: (פ)