Jeremiah Chapter 50
ירמיהו פרק נ
Source: https://ajew.org/reader/tanach-yirmiyahu/1/50

Segment 1
HE:
הדבר אשר דבר יהוה אל בבל אל ארץ כשדים ביד ירמיהו הנביא:

Segment 2
HE:
הגידו בגוים והשמיעו ושאו נס השמיעו אל תכחדו אמרו נלכדה בבל הביש בל חת מרדך הבישו עצביה חתו גלוליה:

Segment 3
HE:
כי עלה עליה גוי מצפון הוא ישית את ארצה לשמה ולא יהיה יושב בה מאדם ועד בהמה נדו הלכו:

Segment 4
HE:
בימים ההמה ובעת ההיא נאם יהוה יבאו בני ישראל המה ובני יהודה יחדו הלוך ובכו ילכו ואת יהוה אלהיהם יבקשו:

Segment 5
HE:
ציון ישאלו דרך הנה פניהם באו ונלוו אל יהוה ברית עולם לא תשכח:

Segment 6
HE:
צאן אבדות (היה) היו עמי רעיהם התעום הרים (שובבים) שובבום מהר אל גבעה הלכו שכחו רבצם:

Segment 7
HE:
כל מוצאיהם אכלום וצריהם אמרו לא נאשם תחת אשר חטאו ליהוה נוה צדק ומקוה אבותיהם יהוה: (ס)

Segment 8
HE:
נדו מתוך בבל ומארץ כשדים (יצאו) צאו והיו כעתודים לפני צאן:

Segment 9
HE:
כי הנה אנכי מעיר ומעלה על בבל קהל גוים גדלים מארץ צפון וערכו לה משם תלכד חציו כגבור משכיל לא ישוב ריקם:

Segment 10
HE:
והיתה כשדים לשלל כל שלליה ישבעו נאם יהוה:

Segment 11
HE:
כי (תשמחי) תשמחו כי (תעלזי) תעלזו שסי נחלתי כי (תפושי) תפושו כעגלה דשה (ותצהלי) ותצהלו כאברים:

Segment 12
HE:
בושה אמכם מאד חפרה יולדתכם הנה אחרית גוים מדבר ציה וערבה:

Segment 13
HE:
מקצף יהוה לא תשב והיתה שממה כלה כל עבר על בבל ישם וישרק על כל מכותיה:

Segment 14
HE:
ערכו על בבל סביב כל דרכי קשת ידו אליה אל תחמלו אל חץ כי ליהוה חטאה:

Segment 15
HE:
הריעו עליה סביב נתנה ידה נפלו (אשויתיה) אשיותיה נהרסו חומותיה כי נקמת יהוה היא הנקמו בה כאשר עשתה עשו לה:

Segment 16
HE:
כרתו זורע מבבל ותפש מגל בעת קציר מפני חרב היונה איש אל עמו יפנו ואיש לארצו ינסו: (ס)

Segment 17
HE:
שה פזורה ישראל אריות הדיחו הראשון אכלו מלך אשור וזה האחרון עצמו נבוכדראצר מלך בבל: (ס)

Segment 18
HE:
לכן כה אמר יהוה צבאות אלהי ישראל הנני פקד אל מלך בבל ואל ארצו כאשר פקדתי אל מלך אשור:

Segment 19
HE:
ושבבתי את ישראל אל נוהו ורעה הכרמל והבשן ובהר אפרים והגלעד תשבע נפשו:

Segment 20
HE:
בימים ההם ובעת ההיא נאם יהוה יבקש את עון ישראל ואיננו ואת חטאת יהודה ולא תמצאינה כי אסלח לאשר אשאיר: (פ)

Segment 21
HE:
על הארץ מרתים עלה עליה ואל יושבי פקוד חרב והחרם אחריהם נאם יהוה ועשה ככל אשר צויתיך: (ס)

Segment 22
HE:
קול מלחמה בארץ ושבר גדול:

Segment 23
HE:
איך נגדע וישבר פטיש כל הארץ איך היתה לשמה בבל בגוים:

Segment 24
HE:
יקשתי לך וגם נלכדת בבל ואת לא ידעת נמצאת וגם נתפשת כי ביהוה התגרית:

Segment 25
HE:
פתח יהוה את אוצרו ויוצא את כלי זעמו כי מלאכה היא לאדני יהוה צבאות בארץ כשדים:

Segment 26
HE:
באו לה מקץ פתחו מאבסיה סלוה כמו ערמים והחרימוה אל תהי לה שארית:

Segment 27
HE:
חרבו כל פריה ירדו לטבח הוי עליהם כי בא יומם עת פקדתם: (ס)

Segment 28
HE:
קול נסים ופלטים מארץ בבל להגיד בציון את נקמת יהוה אלהינו נקמת היכלו:

Segment 29
HE:
השמיעו אל בבל רבים כל דרכי קשת חנו עליה סביב אל יהי לה פלטה שלמו לה כפעלה ככל אשר עשתה עשו לה כי אל יהוה זדה אל קדוש ישראל:

Segment 30
HE:
לכן יפלו בחוריה ברחבתיה וכל אנשי מלחמתה ידמו ביום ההוא נאם יהוה: (פ)

Segment 31
HE:
הנני אליך זדון נאם אדני יהוה צבאות כי בא יומך עת פקדתיך:

Segment 32
HE:
וכשל זדון ונפל ואין לו מקים והצתי אש בעריו ואכלה כל סביבתיו: (ס)

Segment 33
HE:
כה אמר יהוה צבאות עשוקים בני ישראל ובני יהודה יחדו וכל שביהם החזיקו בם מאנו שלחם:

Segment 34
HE:
גאלם חזק יהוה צבאות שמו ריב יריב את ריבם למען הרגיע את הארץ והרגיז לישבי בבל:

Segment 35
HE:
חרב על כשדים נאם יהוה ואל ישבי בבל ואל שריה ואל חכמיה:

Segment 36
HE:
חרב אל הבדים ונאלו חרב אל גבוריה וחתו:

Segment 37
HE:
חרב אל סוסיו ואל רכבו ואל כל הערב אשר בתוכה והיו לנשים חרב אל אוצרתיה ובזזו:

Segment 38
HE:
חרב אל מימיה ויבשו כי ארץ פסלים היא ובאימים יתהללו:

Segment 39
HE:
לכן ישבו ציים את איים וישבו בה בנות יענה ולא תשב עוד לנצח ולא תשכון עד דור ודור:

Segment 40
HE:
כמהפכת אלהים את סדם ואת עמרה ואת שכניה נאם יהוה לא ישב שם איש ולא יגור בה בן אדם:

Segment 41
HE:
הנה עם בא מצפון וגוי גדול ומלכים רבים יערו מירכתי ארץ:

Segment 42
HE:
קשת וכידן יחזיקו אכזרי המה ולא ירחמו קולם כים יהמה ועל סוסים ירכבו ערוך כאיש למלחמה עליך בת בבל:

Segment 43
HE:
שמע מלך בבל את שמעם ורפו ידיו צרה החזיקתהו חיל כיולדה:

Segment 44
HE:
הנה כאריה יעלה מגאון הירדן אל נוה איתן כי ארגעה (ארוצם) אריצם מעליה ומי בחור אליה אפקד כי מי כמוני ומי יועדני ומי זה רעה אשר יעמד לפני:

Segment 45
HE:
לכן שמעו עצת יהוה אשר יעץ אל בבל ומחשבותיו אשר חשב אל ארץ כשדים אם לא יסחבום צעירי הצאן אם לא ישים עליהם נוה:

Segment 46
HE:
מקול נתפשה בבל נרעשה הארץ וזעקה בגוים נשמע: (ס)