Jeremiah Chapter 51
ירמיהו פרק נא
Source: https://ajew.org/reader/tanach-yirmiyahu/1/51

Segment 1
HE:
כה אמר יהוה הנני מעיר על בבל ואל ישבי לב קמי רוח משחית:

Segment 2
HE:
ושלחתי לבבל זרים וזרוה ויבקקו את ארצה כי היו עליה מסביב ביום רעה:

Segment 3
HE:
אל ידרך (ידרך) הדרך קשתו ואל יתעל בסרינו ואל תחמלו אל בחריה החרימו כל צבאה:

Segment 4
HE:
ונפלו חללים בארץ כשדים ומדקרים בחוצותיה:

Segment 5
HE:
כי לא אלמן ישראל ויהודה מאלהיו מיהוה צבאות כי ארצם מלאה אשם מקדוש ישראל:

Segment 6
HE:
נסו מתוך בבל ומלטו איש נפשו אל תדמו בעונה כי עת נקמה היא ליהוה גמול הוא משלם לה:

Segment 7
HE:
כוס זהב בבל ביד יהוה משכרת כל הארץ מיינה שתו גוים על כן יתהללו גוים:

Segment 8
HE:
פתאם נפלה בבל ותשבר הילילו עליה קחו צרי למכאובה אולי תרפא:

Segment 9
HE:
(רפאנו) רפינו את בבל ולא נרפתה עזבוה ונלך איש לארצו כי נגע אל השמים משפטה ונשא עד שחקים:

Segment 10
HE:
הוציא יהוה את צדקתינו באו ונספרה בציון את מעשה יהוה אלהינו: (ס)

Segment 11
HE:
הברו החצים מלאו השלטים העיר יהוה את רוח מלכי מדי כי על בבל מזמתו להשחיתה כי נקמת יהוה היא נקמת היכלו:

Segment 12
HE:
אל חומת בבל שאו נס החזיקו המשמר הקימו שמרים הכינו הארבים כי גם זמם יהוה גם עשה את אשר דבר אל ישבי בבל:

Segment 13
HE:
(שכנתי) שכנת על מים רבים רבת אוצרת בא קצך אמת בצעך:

Segment 14
HE:
נשבע יהוה צבאות בנפשו כי אם מלאתיך אדם כילק וענו עליך הידד: (ס)

Segment 15
HE:
עשה ארץ בכחו מכין תבל בחכמתו ובתבונתו נטה שמים:

Segment 16
HE:
לקול תתו המון מים בשמים ויעל נשאים מקצה ארץ ברקים למטר עשה ויצא רוח מאצרתיו:

Segment 17
HE:
נבער כל אדם מדעת הביש כל צרף מפסל כי שקר נסכו ולא רוח בם:

Segment 18
HE:
הבל המה מעשה תעתעים בעת פקדתם יאבדו:

Segment 19
HE:
לא כאלה חלק יעקוב כי יוצר הכל הוא ושבט נחלתו יהוה צבאות שמו: (פ)

Segment 20
HE:
מפץ אתה לי כלי מלחמה ונפצתי בך גוים והשחתי בך ממלכות:

Segment 21
HE:
ונפצתי בך סוס ורכבו ונפצתי בך רכב ורכבו:

Segment 22
HE:
ונפצתי בך איש ואשה ונפצתי בך זקן ונער ונפצתי בך בחור ובתולה:

Segment 23
HE:
ונפצתי בך רעה ועדרו ונפצתי בך אכר וצמדו ונפצתי בך פחות וסגנים:

Segment 24
HE:
ושלמתי לבבל ולכל יושבי כשדים את כל רעתם אשר עשו בציון לעיניכם נאם יהוה: (ס)

Segment 25
HE:
הנני אליך הר המשחית נאם יהוה המשחית את כל הארץ ונטיתי את ידי עליך וגלגלתיך מן הסלעים ונתתיך להר שרפה:

Segment 26
HE:
ולא יקחו ממך אבן לפנה ואבן למוסדות כי שממות עולם תהיה נאם יהוה:

Segment 27
HE:
שאו נס בארץ תקעו שופר בגוים קדשו עליה גוים השמיעו עליה ממלכות אררט מני ואשכנז פקדו עליה טפסר העלו סוס כילק סמר:

Segment 28
HE:
קדשו עליה גוים את מלכי מדי את פחותיה ואת כל סגניה ואת כל ארץ ממשלתו:

Segment 29
HE:
ותרעש הארץ ותחל כי קמה על בבל מחשבות יהוה לשום את ארץ בבל לשמה מאין יושב:

Segment 30
HE:
חדלו גבורי בבל להלחם ישבו במצדות נשתה גבורתם היו לנשים הציתו משכנתיה נשברו בריחיה:

Segment 31
HE:
רץ לקראת רץ ירוץ ומגיד לקראת מגיד להגיד למלך בבל כי נלכדה עירו מקצה:

Segment 32
HE:
והמעברות נתפשו ואת האגמים שרפו באש ואנשי המלחמה נבהלו: (ס)

Segment 33
HE:
כי כה אמר יהוה צבאות אלהי ישראל בת בבל כגרן עת הדריכה עוד מעט ובאה עת הקציר לה:

Segment 34
HE:
(אכלנו) אכלני (הממנו) הממני נבוכדראצר מלך בבל (הציגנו) הציגני כלי ריק (בלענו) בלעני כתנין מלא כרשו מעדני (הדיחנו) הדיחני:

Segment 35
HE:
חמסי ושארי על בבל תאמר ישבת ציון ודמי אל ישבי כשדים תאמר ירושלם: (ס)

Segment 36
HE:
לכן כה אמר יהוה הנני רב את ריבך ונקמתי את נקמתך והחרבתי את ימה והבשתי את מקורה:

Segment 37
HE:
והיתה בבל לגלים מעון תנים שמה ושרקה מאין יושב:

Segment 38
HE:
יחדו ככפרים ישאגו נערו כגורי אריות:

Segment 39
HE:
בחמם אשית את משתיהם והשכרתים למען יעלזו וישנו שנת עולם ולא יקיצו נאם יהוה:

Segment 40
HE:
אורידם ככרים לטבוח כאילים עם עתודים:

Segment 41
HE:
איך נלכדה ששך ותתפש תהלת כל הארץ איך היתה לשמה בבל בגוים:

Segment 42
HE:
עלה על בבל הים בהמון גליו נכסתה:

Segment 43
HE:
היו עריה לשמה ארץ ציה וערבה ארץ לא ישב בהן כל איש ולא יעבר בהן בן אדם:

Segment 44
HE:
ופקדתי על בל בבבל והצאתי את בלעו מפיו ולא ינהרו אליו עוד גוים גם חומת בבל נפלה:

Segment 45
HE:
צאו מתוכה עמי ומלטו איש את נפשו מחרון אף יהוה:

Segment 46
HE:
ופן ירך לבבכם ותיראו בשמועה הנשמעת בארץ ובא בשנה השמועה ואחריו בשנה השמועה וחמס בארץ ומשל על משל:

Segment 47
HE:
לכן הנה ימים באים ופקדתי על פסילי בבל וכל ארצה תבוש וכל חלליה יפלו בתוכה:

Segment 48
HE:
ורננו על בבל שמים וארץ וכל אשר בהם כי מצפון יבוא לה השודדים נאם יהוה:

Segment 49
HE:
גם בבל לנפל חללי ישראל גם לבבל נפלו חללי כל הארץ:

Segment 50
HE:
פלטים מחרב הלכו אל תעמדו זכרו מרחוק את יהוה וירושלם תעלה על לבבכם:

Segment 51
HE:
בשנו כי שמענו חרפה כסתה כלמה פנינו כי באו זרים על מקדשי בית יהוה: (פ)

Segment 52
HE:
לכן הנה ימים באים נאם יהוה ופקדתי על פסיליה ובכל ארצה יאנק חלל:

Segment 53
HE:
כי תעלה בבל השמים וכי תבצר מרום עזה מאתי יבאו שדדים לה נאם יהוה: (ס)

Segment 54
HE:
קול זעקה מבבל ושבר גדול מארץ כשדים:

Segment 55
HE:
כי שדד יהוה את בבל ואבד ממנה קול גדול והמו גליהם כמים רבים נתן שאון קולם:

Segment 56
HE:
כי בא עליה על בבל שודד ונלכדו גבוריה חתתה קשתותם כי אל גמלות יהוה שלם ישלם:

Segment 57
HE:
והשכרתי שריה וחכמיה פחותיה וסגניה וגבוריה וישנו שנת עולם ולא יקיצו נאם המלך יהוה צבאות שמו: (ס)

Segment 58
HE:
כה אמר יהוה צבאות חמות בבל הרחבה ערער תתערער ושעריה הגבהים באש יצתו ויגעו עמים בדי ריק ולאמים בדי אש ויעפו: (ס)

Segment 59
HE:
הדבר אשר צוה ירמיהו הנביא את שריה בן נריה בן מחסיה בלכתו את צדקיהו מלך יהודה בבל בשנת הרבעית למלכו ושריה שר מנוחה:

Segment 60
HE:
ויכתב ירמיהו את כל הרעה אשר תבוא אל בבל אל ספר אחד את כל הדברים האלה הכתבים אל בבל:

Segment 61
HE:
ויאמר ירמיהו אל שריה כבאך בבל וראית וקראת את כל הדברים האלה:

Segment 62
HE:
ואמרת יהוה אתה דברת אל המקום הזה להכריתו לבלתי היות בו יושב למאדם ועד בהמה כי שממות עולם תהיה:

Segment 63
HE:
והיה ככלתך לקרא את הספר הזה תקשר עליו אבן והשלכתו אל תוך פרת:

Segment 64
HE:
ואמרת ככה תשקע בבל ולא תקום מפני הרעה אשר אנכי מביא עליה ויעפו עד הנה דברי ירמיהו: (פ)