Jeremiah Chapter 7
ירמיהו פרק ז
Source: https://ajew.org/reader/tanach-yirmiyahu/1/7

Segment 1
HE:
הדבר אשר היה אל ירמיהו מאת יהוה לאמר:

Segment 2
HE:
עמד בשער בית יהוה וקראת שם את הדבר הזה ואמרת שמעו דבר יהוה כל יהודה הבאים בשערים האלה להשתחות ליהוה: (ס)

Segment 3
HE:
כה אמר יהוה צבאות אלהי ישראל היטיבו דרכיכם ומעלליכם ואשכנה אתכם במקום הזה:

Segment 4
HE:
אל תבטחו לכם אל דברי השקר לאמר היכל יהוה היכל יהוה היכל יהוה המה:

Segment 5
HE:
כי אם היטיב תיטיבו את דרכיכם ואת מעלליכם אם עשו תעשו משפט בין איש ובין רעהו:

Segment 6
HE:
גר יתום ואלמנה לא תעשקו ודם נקי אל תשפכו במקום הזה ואחרי אלהים אחרים לא תלכו לרע לכם:

Segment 7
HE:
ושכנתי אתכם במקום הזה בארץ אשר נתתי לאבותיכם למן עולם ועד עולם:

Segment 8
HE:
הנה אתם בטחים לכם על דברי השקר לבלתי הועיל:

Segment 9
HE:
הגנב רצח ונאף והשבע לשקר וקטר לבעל והלך אחרי אלהים אחרים אשר לא ידעתם:

Segment 10
HE:
ובאתם ועמדתם לפני בבית הזה אשר נקרא שמי עליו ואמרתם נצלנו למען עשות את כל התועבות האלה:

Segment 11
HE:
המערת פרצים היה הבית הזה אשר נקרא שמי עליו בעיניכם גם אנכי הנה ראיתי נאם יהוה:

Segment 12
HE:
כי לכו נא אל מקומי אשר בשילו אשר שכנתי שמי שם בראשונה וראו את אשר עשיתי לו מפני רעת עמי ישראל:

Segment 13
HE:
ועתה יען עשותכם את כל המעשים האלה נאם יהוה ואדבר אליכם השכם ודבר ולא שמעתם ואקרא אתכם ולא עניתם:

Segment 14
HE:
ועשיתי לבית אשר נקרא שמי עליו אשר אתם בטחים בו ולמקום אשר נתתי לכם ולאבותיכם כאשר עשיתי לשלו:

Segment 15
HE:
והשלכתי אתכם מעל פני כאשר השלכתי את כל אחיכם את כל זרע אפרים: (פ)

Segment 16
HE:
ואתה אל תתפלל בעד העם הזה ואל תשא בעדם רנה ותפלה ואל תפגע בי כי אינני שמע אתך:

Segment 17
HE:
האינך ראה מה המה עשים בערי יהודה ובחצות ירושלם:

Segment 18
HE:
הבנים מלקטים עצים והאבות מבערים את האש והנשים לשות בצק לעשות כונים למלכת השמים והסך נסכים לאלהים אחרים למען הכעסני:

Segment 19
HE:
האתי הם מכעסים נאם יהוה הלוא אתם למען בשת פניהם:

Segment 20
HE:
לכן כה אמר אדני יהוה הנה אפי וחמתי נתכת אל המקום הזה על האדם ועל הבהמה ועל עץ השדה ועל פרי האדמה ובערה ולא תכבה: (פ)

Segment 21
HE:
כה אמר יהוה צבאות אלהי ישראל עלותיכם ספו על זבחיכם ואכלו בשר:

Segment 22
HE:
כי לא דברתי את אבותיכם ולא צויתים ביום (הוציא) הוציאי אותם מארץ מצרים על דברי עולה וזבח:

Segment 23
HE:
כי אם את הדבר הזה צויתי אותם לאמר שמעו בקולי והייתי לכם לאלהים ואתם תהיו לי לעם והלכתם בכל הדרך אשר אצוה אתכם למען ייטב לכם:

Segment 24
HE:
ולא שמעו ולא הטו את אזנם וילכו במעצות בשררות לבם הרע ויהיו לאחור ולא לפנים:

Segment 25
HE:
למן היום אשר יצאו אבותיכם מארץ מצרים עד היום הזה ואשלח אליכם את כל עבדי הנביאים יום השכם ושלח:

Segment 26
HE:
ולוא שמעו אלי ולא הטו את אזנם ויקשו את ערפם הרעו מאבותם:

Segment 27
HE:
ודברת אליהם את כל הדברים האלה ולא ישמעו אליך וקראת אליהם ולא יענוכה:

Segment 28
HE:
ואמרת אליהם זה הגוי אשר לוא שמעו בקול יהוה אלהיו ולא לקחו מוסר אבדה האמונה ונכרתה מפיהם: (ס)

Segment 29
HE:
גזי נזרך והשליכי ושאי על שפים קינה כי מאס יהוה ויטש את דור עברתו:

Segment 30
HE:
כי עשו בני יהודה הרע בעיני נאום יהוה שמו שקוציהם בבית אשר נקרא שמי עליו לטמאו:

Segment 31
HE:
ובנו במות התפת אשר בגיא בן הנם לשרף את בניהם ואת בנתיהם באש אשר לא צויתי ולא עלתה על לבי: (פ)

Segment 32
HE:
לכן הנה ימים באים נאם יהוה ולא יאמר עוד התפת וגיא בן הנם כי אם גיא ההרגה וקברו בתפת מאין מקום:

Segment 33
HE:
והיתה נבלת העם הזה למאכל לעוף השמים ולבהמת הארץ ואין מחריד:

Segment 34
HE:
והשבתי מערי יהודה ומחצות ירושלם קול ששון וקול שמחה קול חתן וקול כלה כי לחרבה תהיה הארץ: