Jonah Chapter 2
יונה פרק ב
Source: https://ajew.org/reader/tanach-yonah/1/2

Segment 1
HE:
וימן יהוה דג גדול לבלע את יונה ויהי יונה במעי הדג שלשה ימים ושלשה לילות:

Segment 2
HE:
ויתפלל יונה אל יהוה אלהיו ממעי הדגה:

Segment 3
HE:
ויאמר קראתי מצרה לי אל יהוה ויענני מבטן שאול שועתי שמעת קולי:

Segment 4
HE:
ותשליכני מצולה בלבב ימים ונהר יסבבני כל משבריך וגליך עלי עברו:

Segment 5
HE:
ואני אמרתי נגרשתי מנגד עיניך אך אוסיף להביט אל היכל קדשך:

Segment 6
HE:
אפפוני מים עד נפש תהום יסבבני סוף חבוש לראשי:

Segment 7
HE:
לקצבי הרים ירדתי הארץ ברחיה בעדי לעולם ותעל משחת חיי יהוה אלהי:

Segment 8
HE:
בהתעטף עלי נפשי את יהוה זכרתי ותבוא אליך תפלתי אל היכל קדשך:

Segment 9
HE:
משמרים הבלי שוא חסדם יעזבו:

Segment 10
HE:
ואני בקול תודה אזבחה לך אשר נדרתי אשלמה ישועתה ליהוה: (ס)

Segment 11
HE:
ויאמר יהוה לדג ויקא את יונה אל היבשה: (פ)