Zechariah Chapter 14
זכריה פרק יד
Source: https://ajew.org/reader/tanach-zecharya/1/14

Segment 1
HE:
הנה יום בא ליהוה וחלק שללך בקרבך:

Segment 2
HE:
ואספתי את כל הגוים אל ירושלם למלחמה ונלכדה העיר ונשסו הבתים והנשים (תשגלנה) תשכבנה ויצא חצי העיר בגולה ויתר העם לא יכרת מן העיר:

Segment 3
HE:
ויצא יהוה ונלחם בגוים ההם כיום הלחמו ביום קרב:

Segment 4
HE:
ועמדו רגליו ביום ההוא על הר הזתים אשר על פני ירושלם מקדם ונבקע הר הזיתים מחציו מזרחה וימה גיא גדולה מאד ומש חצי ההר צפונה וחציו נגבה:

Segment 5
HE:
ונסתם גיא הרי כי יגיע גי הרים אל אצל ונסתם כאשר נסתם מפני הרעש בימי עזיה מלך יהודה ובא יהוה אלהי כל קדשים עמך:

Segment 6
HE:
והיה ביום ההוא לא יהיה אור יקרות (יקפאון) וקפאון:

Segment 7
HE:
והיה יום אחד הוא יודע ליהוה לא יום ולא לילה והיה לעת ערב יהיה אור:

Segment 8
HE:
והיה ביום ההוא יצאו מים חיים מירושלם חצים אל הים הקדמוני וחצים אל הים האחרון בקיץ ובחרף יהיה:

Segment 9
HE:
והיה יהוה למלך על כל הארץ ביום ההוא יהיה יהוה אחד ושמו אחד:

Segment 10
HE:
יסוב כל הארץ כערבה מגבע לרמון נגב ירושלם וראמה וישבה תחתיה למשער בנימן עד מקום שער הראשון עד שער הפנים ומגדל חננאל עד יקבי המלך:

Segment 11
HE:
וישבו בה וחרם לא יהיה עוד וישבה ירושלם לבטח: (ס)

Segment 12
HE:
וזאת תהיה המגפה אשר יגף יהוה את כל העמים אשר צבאו על ירושלם המק בשרו והוא עמד על רגליו ועיניו תמקנה בחריהן ולשונו תמק בפיהם:

Segment 13
HE:
והיה ביום ההוא תהיה מהומת יהוה רבה בהם והחזיקו איש יד רעהו ועלתה ידו על יד רעהו:

Segment 14
HE:
וגם יהודה תלחם בירושלם ואסף חיל כל הגוים סביב זהב וכסף ובגדים לרב מאד:

Segment 15
HE:
וכן תהיה מגפת הסוס הפרד הגמל והחמור וכל הבהמה אשר יהיה במחנות ההמה כמגפה הזאת:

Segment 16
HE:
והיה כל הנותר מכל הגוים הבאים על ירושלם ועלו מדי שנה בשנה להשתחות למלך יהוה צבאות ולחג את חג הסכות:

Segment 17
HE:
והיה אשר לא יעלה מאת משפחות הארץ אל ירושלם להשתחות למלך יהוה צבאות ולא עליהם יהיה הגשם:

Segment 18
HE:
ואם משפחת מצרים לא תעלה ולא באה ולא עליהם תהיה המגפה אשר יגף יהוה את הגוים אשר לא יעלו לחג את חג הסכות:

Segment 19
HE:
זאת תהיה חטאת מצרים וחטאת כל הגוים אשר לא יעלו לחג את חג הסכות:

Segment 20
HE:
ביום ההוא יהיה על מצלות הסוס קדש ליהוה והיה הסירות בבית יהוה כמזרקים לפני המזבח:

Segment 21
HE:
והיה כל סיר בירושלם וביהודה קדש ליהוה צבאות ובאו כל הזבחים ולקחו מהם ובשלו בהם ולא יהיה כנעני עוד בבית יהוה צבאות ביום ההוא: (פפפ)