Shabbat 156b

דקאי צדק במערב מהדרנא ומוקמינא ליה במזרח והיינו דכתיב {ישעיה מא-ב} מי העיר ממזרח צדק יקראהו לרגלו ומדשמואל נמי אין מזל לישראל דשמואל ואבלט הוו יתבי והוו קאזלי הנך אינשי לאגמא א''ל אבלט לשמואל האי גברא אזיל ולא אתי טריק ליה חיויא ומיית א''ל שמואל אי בר ישראל הוא אזיל ואתי אדיתבי אזיל ואתי קם אבלט שדיה לטוניה אשכח ביה חיויא דפסיק ושדי בתרתי גובי א''ל שמואל מאי עבדת א''ל כל יומא הוה מרמינן ריפתא בהדי

הדדי ואכלינן האידנא הוה איכא חד מינן דלא הוה ליה ריפתא הוה קא מיכסף אמינא להו אנא קאימנא וארמינא כי מטאי לגביה שואי נפשאי כמאן דשקילי מיניה כי היכי דלא ליכסיף א''ל מצוה עבדת נפק שמואל ודרש {משלי י-ב} וצדקה תציל ממות ולא ממיתה משונה אלא ממיתה עצמה ומדר''ע נמי אין מזל לישראל דר''ע הויא ליה ברתא אמרי ליה כלדאי ההוא יומא דעיילה לבי גננא טריק לה חיויא ומיתא הוה דאיגא אמילתא טובא ההוא יומא שקלתה למכבנתא

דצתא בגודא איתרמי איתיב בעיניה דחיויא לצפרא כי קא שקלה לה הוה קא סריך ואתי חיויא בתרה אמר לה אבוה מאי עבדת אמרה ליה בפניא אתא עניא קרא אבבא והוו טרידי כולי עלמא בסעודתא וליכא דשמעיה קאימנא שקלתי לריסתנאי דיהבית לי יהבתיה ניהליה אמר לה מצוה עבדת נפק ר''ע ודרש וצדקה תציל ממות ולא ממיתה משונה אלא ממיתה עצמה ומדר''נ בר יצחק נמי אין מזל לישראל דאימיה דר''נ בר יצחק אמרי לה כלדאי בריך גנבא הוה לא שבקתיה

גלויי רישיה אמרה ליה כסי רישיך כי היכי דתיהוו עלך אימתא דשמיא ובעי רחמי לא הוה ידע אמאי קאמרה ליה יומא חד יתיב קא גריס תותי דיקלא נפל גלימא מעילויה רישיה דלי עיניה חזא לדיקלא אלמיה יצריה סליק פסקיה לקיבורא בשיניה:

מתני' מחתכין את הדלועין לפני הבהמה ואת הנבלה לפני הכלבים רבי יהודה אומר אם לא היתה נבלה מערב שבת אסורה לפי שאינה מן המוכן:

גמ' איתמר (ער''ל שח''ז סימן) אמר עולא הלכה כרבי יהודה (ושמואל אמר הלכה כר''ש) ואף רב סבר הלכה כרבי יהודה מדכרכי דזוזי דרב אסר ושמואל שרי ואף לוי סבר הלכה כרבי יהודה כי הא דלוי כי הוו מייתי טריפתא לקמיה ביומא טבא לא הוה חזי לה אלא כי יתיב אקילקליתא דאמר דילמא לא מתכשרא ואפילו לכלבים לא חזיא ושמואל אמר הלכה כרבי שמעון ואף זעירי סבר הלכה כר''ש דתנן בהמה שמתה לא יזיזנה ממקומה ותרגמא זעירי בבהמת קדשים

אבל בחולין שפיר דמי ואף רבי יוחנן אמר הלכה כר''ש ומי א''ר יוחנן הכי והא א''ר יוחנן הלכה כסתם

משנה ו תנן