Yoma 5b

מילתא דכתיבא בהאי ענינא מילתא דלא כתיבא בהאי ענינא מנא לן אמר רב נחמן בר יצחק יליף פתח פתח רב משרשיא אמר {ויקרא ח-לה} ושמרתם את משמרת ה' עכובא רב אשי אמר {ויקרא ח-לה} כי כן צויתי עכובא ת''ר כי כן צויתי {ויקרא י-יח} כאשר צויתי {ויקרא י-טו} כאשר צוה ה' כי כן צויתי באנינות יאכלוה כאשר צויתי בשעת מעשה אמר להם כאשר צוה ה' ולא מאלי אני אומר א''ר יוסי בר חנינא מכנסים אין כתובין בפרשה כשהוא אומר {שמות

כט-א} וזה הדבר אשר תעשה להם לקדש אותם לכהן להביא המכנסים ועשירית האיפה בשלמא מכנסים כתיבי בענינא דבגדים אלא עשירית האיפה מנא לן אתיא זה זה {ויקרא ו-יג} מוזה קרבן אהרן ובניו אשר יקריבו לה' עשירית האיפה א''ר יוחנן משום ר''ש בן יוחאי מניין שאף מקרא פרשה מעכב ת''ל {ויקרא ח-ה} ויאמר משה אל העדה זה הדבר אשר צוה ה' אפילו דיבור מעכב כיצד הלבישן כיצד הלבישן מאי דהוה הוה אלא כיצד מלבישן לעתיד לבוא לעתיד

לבוא נמי לכשיבואו אהרן ובניו ומשה עמהם אלא כיצד הלבישן למיסבר קראי פליגי בה בני ר' חייא ורבי יוחנן חד אמר אהרן ואח''כ בניו וחד אמר אהרן ובניו בבת אחת אמר אביי בכתונת ומצנפת כולי עלמא לא פליגי דאהרן ואח''כ בניו דבין בצוואה ובין בעשיה אהרן קדים כי פליגי באבנט מאן דאמר אהרן ואחר כך בניו דכתיב {ויקרא ח-ז} ויחגור אותו באבנט והדר כתיב ויחגור אותם אבנט ומאן דאמר אהרן ובניו בבת אחת דכתיב {שמות כט-ט} וחגרת

אותם ולמאן דאמר אהרן ובניו בבת אחת הכתיב ויחגור אותו באבנט והדר כתיב ויחגור אותם אבנט