Deuteronomy Chapter 30

&nbspרביעי - במחוברות שני&nbsp&nbspוְהָיָה כִֽי יָבֹאוּ עָלֶיךָ כָּל הַדְּבָרִים הָאֵלֶּה הַבְּרָכָה וְהַקְּלָלָה אֲשֶׁר נָתַתִּי לְפָנֶיךָ וַֽהֲשֵֽׁבֹתָ אֶל לְבָבֶךָ בְּכָל הַגּוֹיִם אֲשֶׁר הִֽדִּֽיחֲךָ יְהֹוָה אֱלֹהֶיךָ שָֽׁמָּה:

וְשַׁבְתָּ עַד יְהֹוָה אֱלֹהֶיךָ וְשָֽׁמַעְתָּ בְקֹלוֹ כְּכֹל אֲשֶׁר אָֽנֹכִי מְצַוְּךָ הַיּוֹם אַתָּה וּבָנֶיךָ בְּכָל לְבָֽבְךָ וּבְכָל נַפְשֶֽׁךָ:

וְשָׁב יְהֹוָה אֱלֹהֶיךָ אֶת שְׁבֽוּתְךָ וְרִֽחֲמֶךָ וְשָׁב וְקִבֶּצְךָ מִכָּל הָעַמִּים אֲשֶׁר הֱפִֽיצְךָ יְהֹוָה אֱלֹהֶיךָ שָֽׁמָּה:

אִם יִֽהְיֶה נִֽדַּֽחֲךָ בִּקְצֵה הַשָּׁמָיִם מִשָּׁם יְקַבֶּצְךָ יְהֹוָה אֱלֹהֶיךָ וּמִשָּׁם יִקָּחֶֽךָ:

וֶֽהֱבִֽיאֲךָ יְהֹוָה אֱלֹהֶיךָ אֶל הָאָרֶץ אֲשֶׁר יָֽרְשׁוּ אֲבֹתֶיךָ וִֽירִשְׁתָּהּ וְהֵיטִֽבְךָ וְהִרְבְּךָ מֵֽאֲבֹתֶֽיךָ:

וּמָל יְהֹוָה אֱלֹהֶיךָ אֶת לְבָֽבְךָ וְאֶת לְבַב זַרְעֶךָ לְאַֽהֲבָה אֶת יְהֹוָה אֱלֹהֶיךָ בְּכָל לְבָֽבְךָ וּבְכָל נַפְשְׁךָ לְמַעַן חַיֶּֽיךָ:

&nbspחמישי - במחוברות שלישי&nbsp&nbspוְנָתַן יְהֹוָה אֱלֹהֶיךָ אֵת כָּל הָֽאָלוֹת הָאֵלֶּה עַל אֹֽיְבֶיךָ וְעַל שֹֽׂנְאֶיךָ אֲשֶׁר רְדָפֽוּךָ:

וְאַתָּה תָשׁוּב וְשָֽׁמַעְתָּ בְּקוֹל יְהֹוָה וְעָשִׂיתָ אֶת כָּל מִצְוֹתָיו אֲשֶׁר אָֽנֹכִי מְצַוְּךָ הַיּֽוֹם:

וְהוֹתִֽירְךָ יְהֹוָה אֱלֹהֶיךָ בְּכֹל מַֽעֲשֵׂה יָדֶךָ בִּפְרִי בִטְנְךָ וּבִפְרִי בְהֶמְתְּךָ וּבִפְרִי אַדְמָֽתְךָ לְטֹבָה כִּי יָשׁוּב יְהֹוָה לָשׂוּשׂ עָלֶיךָ לְטוֹב כַּֽאֲשֶׁר שָׂשׂ עַל אֲבֹתֶֽיךָ:

כִּי תִשְׁמַע בְּקוֹל יְהֹוָה אֱלֹהֶיךָ לִשְׁמֹר מִצְוֹתָיו וְחֻקֹּתָיו הַכְּתוּבָה בְּסֵפֶר הַתּוֹרָה הַזֶּה כִּי תָשׁוּב אֶל יְהֹוָה אֱלֹהֶיךָ בְּכָל לְבָֽבְךָ וּבְכָל נַפְשֶֽׁךָ: (ס)

&nbspשישי&nbsp&nbspכִּי הַמִּצְוָה הַזֹּאת אֲשֶׁר אָֽנֹכִי מְצַוְּךָ הַיּוֹם לֹֽא נִפְלֵאת הִוא מִמְּךָ וְלֹֽא רְחֹקָה הִֽוא:

לֹא בַשָּׁמַיִם הִוא לֵאמֹר מִי יַֽעֲלֶה לָּנוּ הַשָּׁמַיְמָה וְיִקָּחֶהָ לָּנוּ וְיַשְׁמִעֵנוּ אֹתָהּ וְנַֽעֲשֶֽׂנָּה:

וְלֹֽא מֵעֵבֶר לַיָּם הִוא לֵאמֹר מִי יַֽעֲבָר לָנוּ אֶל עֵבֶר הַיָּם וְיִקָּחֶהָ לָּנוּ וְיַשְׁמִעֵנוּ אֹתָהּ וְנַֽעֲשֶֽׂנָּה:

כִּֽי קָרוֹב אֵלֶיךָ הַדָּבָר מְאֹד בְּפִיךָ וּבִלְבָֽבְךָ לַֽעֲשֹׂתֽוֹ: (ס)

&nbspשביעי - במחוברות רביעי&nbsp&nbspרְאֵה נָתַתִּי לְפָנֶיךָ הַיּוֹם אֶת הַֽחַיִּים וְאֶת הַטּוֹב וְאֶת הַמָּוֶת וְאֶת הָרָֽע:

אֲשֶׁר אָֽנֹכִי מְצַוְּךָ הַיּוֹם לְאַֽהֲבָה אֶת יְהֹוָה אֱלֹהֶיךָ לָלֶכֶת בִּדְרָכָיו וְלִשְׁמֹר מִצְוֹתָיו וְחֻקֹּתָיו וּמִשְׁפָּטָיו וְחָיִיתָ וְרָבִיתָ וּבֵֽרַכְךָ יְהֹוָה אֱלֹהֶיךָ בָּאָרֶץ אֲשֶׁר אַתָּה בָא שָׁמָּה לְרִשְׁתָּֽהּ:

וְאִם יִפְנֶה לְבָֽבְךָ וְלֹא תִשְׁמָע וְנִדַּחְתָּ וְהִֽשְׁתַּֽחֲוִיתָ לֵֽאלֹהִים אֲחֵרִים וַֽעֲבַדְתָּֽם:

הִגַּדְתִּי לָכֶם הַיּוֹם כִּי אָבֹד תֹּֽאבֵדוּן לֹא תַֽאֲרִיכֻן יָמִים עַל הָאֲדָמָה אֲשֶׁר אַתָּה עֹבֵר אֶת הַיַּרְדֵּן לָבוֹא שָׁמָּה לְרִשְׁתָּֽהּ:

הַֽעִדֹתִי בָכֶם הַיּוֹם אֶת הַשָּׁמַיִם וְאֶת הָאָרֶץ הַֽחַיִּים וְהַמָּוֶת נָתַתִּי לְפָנֶיךָ הַבְּרָכָה וְהַקְּלָלָה וּבָֽחַרְתָּ בַּֽחַיִּים לְמַעַן תִּֽחְיֶה אַתָּה וְזַרְעֶֽךָ:

לְאַֽהֲבָה אֶת יְהֹוָה אֱלֹהֶיךָ לִשְׁמֹעַ בְּקֹלוֹ וּלְדָבְקָה בוֹ כִּי הוּא חַיֶּיךָ וְאֹרֶךְ יָמֶיךָ לָשֶׁבֶת עַל הָֽאֲדָמָה אֲשֶׁר נִשְׁבַּע יְהֹוָה לַֽאֲבֹתֶיךָ לְאַבְרָהָם לְיִצְחָק וּֽלְיַֽעֲקֹב לָתֵת לָהֶֽם: (פפפ)