Deuteronomy Chapter 24

כִּֽי יִקַּח אִישׁ אִשָּׁה וּבְעָלָהּ וְהָיָה אִם לֹא תִמְצָא חֵן בְּעֵינָיו כִּי מָצָא בָהּ עֶרְוַת דָּבָר וְכָתַב לָהּ סֵפֶר כְּרִיתֻת וְנָתַן בְּיָדָהּ וְשִׁלְּחָהּ מִבֵּיתֽוֹ:

וְיָֽצְאָה מִבֵּיתוֹ וְהָֽלְכָה וְהָֽיְתָה לְאִֽישׁ אַחֵֽר:

וּשְׂנֵאָהּ הָאִישׁ הָאַֽחֲרוֹן וְכָתַב לָהּ סֵפֶר כְּרִיתֻת וְנָתַן בְּיָדָהּ וְשִׁלְּחָהּ מִבֵּיתוֹ אוֹ כִי יָמוּת הָאִישׁ הָאַֽחֲרוֹן אֲשֶׁר לְקָחָהּ לוֹ לְאִשָּֽׁה:

לֹֽא יוּכַל בַּעְלָהּ הָֽרִאשׁוֹן אֲשֶׁר שִׁלְּחָהּ לָשׁוּב לְקַחְתָּהּ לִהְיוֹת לוֹ לְאִשָּׁה אַֽחֲרֵי אֲשֶׁר הֻטַּמָּאָה כִּי תֽוֹעֵבָה הִוא לִפְנֵי יְהֹוָה וְלֹא תַֽחֲטִיא אֶת הָאָרֶץ אֲשֶׁר יְהֹוָה אֱלֹהֶיךָ נֹתֵן לְךָ נַֽחֲלָֽה: (ס)

&nbspשישי&nbsp&nbspכִּֽי יִקַּח אִישׁ אִשָּׁה חֲדָשָׁה לֹא יֵצֵא בַּצָּבָא וְלֹא יַֽעֲבֹר עָלָיו לְכָל דָּבָר נָקִי יִהְיֶה לְבֵיתוֹ שָׁנָה אֶחָת וְשִׂמַּח אֶת אִשְׁתּוֹ אֲשֶׁר לָקָֽח:

לֹא יַֽחֲבֹל רֵחַיִם וָרָכֶב כִּי נֶפֶשׁ הוּא חֹבֵֽל: (ס)

כִּֽי יִמָּצֵא אִישׁ גֹּנֵב נֶפֶשׁ מֵֽאֶחָיו מִבְּנֵי יִשְׂרָאֵל וְהִתְעַמֶּר בּוֹ וּמְכָרוֹ וּמֵת הַגַּנָּב הַהוּא וּבִֽעַרְתָּ הָרָע מִקִּרְבֶּֽךָ: (ס)

הִשָּׁמֶר בְּנֶֽגַע הַצָּרַעַת לִשְׁמֹר מְאֹד וְלַֽעֲשׂוֹת כְּכֹל אֲשֶׁר יוֹרוּ אֶתְכֶם הַכֹּֽהֲנִים הַֽלְוִיִּם כַּֽאֲשֶׁר צִוִּיתִם תִּשְׁמְרוּ לַֽעֲשֽׂוֹת:

זָכוֹר אֵת אֲשֶׁר עָשָׂה יְהֹוָה אֱלֹהֶיךָ לְמִרְיָם בַּדֶּרֶךְ בְּצֵֽאתְכֶם מִמִּצְרָֽיִם: (ס)

כִּֽי תַשֶּׁה בְרֵֽעֲךָ מַשַּׁאת מְאוּמָה לֹֽא תָבֹא אֶל בֵּיתוֹ לַֽעֲבֹט עֲבֹטֽוֹ:

בַּחוּץ תַּֽעֲמֹד וְהָאִישׁ אֲשֶׁר אַתָּה נֹשֶׁה בוֹ יוֹצִיא אֵלֶיךָ אֶת הָֽעֲבוֹט הַחֽוּצָה:

וְאִם אִישׁ עָנִי הוּא לֹא תִשְׁכַּב בַּֽעֲבֹטֽוֹ:

הָשֵׁב תָּשִׁיב לוֹ אֶת הָֽעֲבוֹט כְּבוֹא הַשֶּׁמֶשׁ וְשָׁכַב בְּשַׂלְמָתוֹ וּבֵֽרֲכֶךָּ וּלְךָ תִּהְיֶה צְדָקָה לִפְנֵי יְהֹוָה אֱלֹהֶֽיךָ: (ס)

&nbspשביעי&nbsp&nbspלֹא תַֽעֲשֹׁק שָׂכִיר עָנִי וְאֶבְיוֹן מֵֽאַחֶיךָ אוֹ מִגֵּֽרְךָ אֲשֶׁר בְּאַרְצְךָ בִּשְׁעָרֶֽיךָ:

בְּיוֹמוֹ תִתֵּן שְׂכָרוֹ וְֽלֹֽא תָבוֹא עָלָיו הַשֶּׁמֶשׁ כִּי עָנִי הוּא וְאֵלָיו הוּא נֹשֵׂא אֶת נַפְשׁוֹ וְלֹֽא יִקְרָא עָלֶיךָ אֶל יְהֹוָה וְהָיָה בְךָ חֵֽטְא: (ס)

לֹא יֽוּמְתוּ אָבוֹת עַל בָּנִים וּבָנִים לֹא יֽוּמְתוּ עַל אָבוֹת אִישׁ בְּחֶטְאוֹ יוּמָֽתוּ: (ס)

לֹא תַטֶּה מִשְׁפַּט גֵּר יָתוֹם וְלֹא תַֽחֲבֹל בֶּגֶד אַלְמָנָֽה:

וְזָֽכַרְתָּ כִּי עֶבֶד הָיִיתָ בְּמִצְרַיִם וַֽיִּפְדְּךָ יְהֹוָה אֱלֹהֶיךָ מִשָּׁם עַל כֵּן אָֽנֹכִי מְצַוְּךָ לַֽעֲשׂוֹת אֶת הַדָּבָר הַזֶּֽה: (ס)

כִּי תִקְצֹר קְצִֽירְךָ בְשָׂדֶךָ וְשָֽׁכַחְתָּ עֹמֶר בַּשָּׂדֶה לֹא תָשׁוּב לְקַחְתּוֹ לַגֵּר לַיָּתוֹם וְלָֽאַלְמָנָה יִֽהְיֶה לְמַעַן יְבָֽרֶכְךָ יְהֹוָה אֱלֹהֶיךָ בְּכֹל מַֽעֲשֵׂה יָדֶֽיךָ: (ס)

כִּי תַחְבֹּט זֵֽיתְךָ לֹא תְפַאֵר אַֽחֲרֶיךָ לַגֵּר לַיָּתוֹם וְלָֽאַלְמָנָה יִֽהְיֶֽה:

כִּי תִבְצֹר כַּרְמְךָ לֹא תְעוֹלֵל אַֽחֲרֶיךָ לַגֵּר לַיָּתוֹם וְלָֽאַלְמָנָה יִֽהְיֶֽה:

וְזָכַרְתָּ כִּי עֶבֶד הָיִיתָ בְּאֶרֶץ מִצְרָיִם עַל כֵּן אָֽנֹכִי מְצַוְּךָ לַֽעֲשׂוֹת אֶת הַדָּבָר הַזֶּֽה: (ס)