Chronicles 1 Chapter 16

וַיָּבִיאוּ אֶת אֲרוֹן הָאֱלֹהִים וַיַּצִּיגוּ אֹתוֹ בְּתוֹךְ הָאֹהֶל אֲשֶׁר נָטָה לוֹ דָּוִיד וַיַּקְרִיבוּ עֹלוֹת וּשְׁלָמִים לִפְנֵי הָאֱלֹהִים:

וַיְכַל דָּוִיד מֵהַעֲלוֹת הָעֹלָה וְהַשְּׁלָמִים וַיְבָרֶךְ אֶת הָעָם בְּשֵׁם יְהוָה:

וַיְחַלֵּק לְכָל אִישׁ יִשְׂרָאֵל מֵאִישׁ וְעַד אִשָּׁה לְאִישׁ כִּכַּר לֶחֶם וְאֶשְׁפָּר וַאֲשִׁישָׁה:

וַיִּתֵּן לִפְנֵי אֲרוֹן יְהוָה מִן הַלְוִיִּם מְשָׁרְתִים וּלְהַזְכִּיר וּלְהוֹדוֹת וּלְהַלֵּל לַיהוָה אֱלֹהֵי יִשְׂרָאֵל: (ס)

אָסָף הָרֹאשׁ וּמִשְׁנֵהוּ זְכַרְיָה יְעִיאֵל וּשְׁמִירָמוֹת וִיחִיאֵל וּמַתִּתְיָה וֶאֱלִיאָב וּבְנָיָהוּ וְעֹבֵד אֱדֹם וִיעִיאֵל בִּכְלֵי נְבָלִים וּבְכִנֹּרוֹת וְאָסָף בַּמְצִלְתַּיִם מַשְׁמִיעַ:

וּבְנָיָהוּ וְיַחֲזִיאֵל הַכֹּהֲנִים בַּחֲצֹצְרוֹת תָּמִיד לִפְנֵי אֲרוֹן בְּרִית הָאֱלֹהִים:

בַּיּוֹם הַהוּא אָז נָתַן דָּוִיד בָּרֹאשׁ לְהֹדוֹת לַיהוָה בְּיַד אָסָף וְאֶחָיו:

הוֹדוּ לַיהוָה קִרְאוּ בִשְׁמוֹ (ס) הוֹדִיעוּ בָעַמִּים עֲלִילֹתָיו:

שִׁירוּ לוֹ זַמְּרוּ לוֹ (ס) שִׂיחוּ בְּכָל נִפְלְאֹתָיו:

הִתְהַלְלוּ בְּשֵׁם קָדְשׁוֹ (ס) יִשְׂמַח לֵב מְבַקְשֵׁי יְהוָה:

דִּרְשׁוּ יְהוָה וְעֻזּוֹ (ס) בַּקְּשׁוּ פָנָיו תָּמִיד:

זִכְרוּ נִפְלְאֹתָיו אֲשֶׁר עָשָׂה (ס) מֹפְתָיו וּמִשְׁפְּטֵי פִיהוּ:

זֶרַע יִשְׂרָאֵל עַבְדּוֹ (ס) בְּנֵי יַעֲקֹב בְּחִירָיו:

הוּא יְהוָה אֱלֹהֵינוּ (ס) בְּכָל הָאָרֶץ מִשְׁפָּטָיו:

זִכְרוּ לְעוֹלָם בְּרִיתוֹ (ס) דָּבָר צִוָּה לְאֶלֶף דּוֹר:

אֲשֶׁר כָּרַת אֶת אַבְרָהָם (ס) וּשְׁבוּעָתוֹ לְיִצְחָק:

וַיַּעֲמִידֶהָ לְיַעֲקֹב לְחֹק (ס) לְיִשְׂרָאֵל בְּרִית עוֹלָם:

לֵאמֹר לְךָ אֶתֵּן אֶרֶץ כְּנָעַן (ס) חֶבֶל נַחֲלַתְכֶם:

בִּהְיוֹתְכֶם מְתֵי מִסְפָּר (ס) כִּמְעַט וְגָרִים בָּהּ:

וַיִּתְהַלְּכוּ מִגּוֹי אֶל גּוֹי (ס) וּמִמַּמְלָכָה אֶל עַם אַחֵר:

לֹא הִנִּיחַ לְאִישׁ לְעָשְׁקָם (ס) וַיּוֹכַח עֲלֵיהֶם מְלָכִים:

אַל תִּגְּעוּ בִּמְשִׁיחָי (ס) וּבִנְבִיאַי אַל תָּרֵעוּ:

שִׁירוּ לַיהוָה כָּל הָאָרֶץ (ס) בַּשְּׂרוּ מִיּוֹם אֶל יוֹם יְשׁוּעָתוֹ:

סַפְּרוּ בַגּוֹיִם אֶת כְּבוֹדוֹ (ס) בְּכָל הָעַמִּים נִפְלְאֹתָיו:

כִּי גָדוֹל יְהוָה וּמְהֻלָּל מְאֹד (ס) וְנוֹרָא הוּא עַל כָּל אֱלֹהִים:

כִּי כָּל אֱלֹהֵי הָעַמִּים אֱלִילִים (ס) וַיהוָה שָׁמַיִם עָשָׂה:

הוֹד וְהָדָר לְפָנָיו (ס) עֹז וְחֶדְוָה בִּמְקֹמוֹ:

הָבוּ לַיהוָה מִשְׁפְּחוֹת עַמִּים (ס) הָבוּ לַיהוָה כָּבוֹד וָעֹז:

הָבוּ לַיהוָה כְּבוֹד שְׁמוֹ (ס) שְׂאוּ מִנְחָה וּבֹאוּ לְפָנָיו הִשְׁתַּחֲווּ לַיהוָה בְּהַדְרַת קֹדֶשׁ: (ס)

חִילוּ מִלְּפָנָיו כָּל הָאָרֶץ אַף תִּכּוֹן תֵּבֵל בַּל תִּמּוֹט: (ס)

יִשְׂמְחוּ הַשָּׁמַיִם וְתָגֵל הָאָרֶץ וְיֹאמְרוּ בַגּוֹיִם יְהוָה מָלָךְ: (ס)

יִרְעַם הַיָּם וּמְלוֹאוֹ יַעֲלֹץ הַשָּׂדֶה וְכָל אֲשֶׁר בּוֹ: (ס)

אָז יְרַנְּנוּ עֲצֵי הַיָּעַר מִלִּפְנֵי יְהוָה כִּי בָא לִשְׁפּוֹט אֶת הָאָרֶץ: (ס)

הוֹדוּ לַיהוָה כִּי טוֹב כִּי לְעוֹלָם חַסְדּוֹ: (ס)

וְאִמְרוּ הוֹשִׁיעֵנוּ אֱלֹהֵי יִשְׁעֵנוּ וְקַבְּצֵנוּ וְהַצִּילֵנוּ מִן הַגּוֹיִם (ס) לְהֹדוֹת לְשֵׁם קָדְשֶׁךָ לְהִשְׁתַּבֵּחַ בִּתְהִלָּתֶךָ: (ס)

בָּרוּךְ יְהוָה אֱלֹהֵי יִשְׂרָאֵל מִן הָעוֹלָם וְעַד הָעֹלָם וַיֹּאמְרוּ כָל הָעָם אָמֵן (ס) וְהַלֵּל לַיהוָה:

וַיַּעֲזָב שָׁם לִפְנֵי אֲרוֹן בְּרִית יְהוָה לְאָסָף וּלְאֶחָיו לְשָׁרֵת לִפְנֵי הָאָרוֹן תָּמִיד לִדְבַר יוֹם בְּיוֹמוֹ:

וְעֹבֵד אֱדֹם וַאֲחֵיהֶם שִׁשִּׁים וּשְׁמוֹנָה (ס) וְעֹבֵד אֱדֹם בֶּן יְדִיתוּן וְחֹסָה לְשֹׁעֲרִים:

וְאֵת צָדוֹק הַכֹּהֵן וְאֶחָיו הַכֹּהֲנִים לִפְנֵי מִשְׁכַּן יְהוָה בַּבָּמָה אֲשֶׁר בְּגִבְעוֹן:

לְהַעֲלוֹת עֹלוֹת לַיהוָה עַל מִזְבַּח הָעֹלָה תָּמִיד לַבֹּקֶר וְלָעָרֶב וּלְכָל הַכָּתוּב בְּתוֹרַת יְהוָה אֲשֶׁר צִוָּה עַל יִשְׂרָאֵל:

וְעִמָּהֶם הֵימָן וִידוּתוּן וּשְׁאָר הַבְּרוּרִים אֲשֶׁר נִקְּבוּ בְּשֵׁמוֹת לְהֹדוֹת לַיהוָה כִּי לְעוֹלָם חַסְדּוֹ:

וְעִמָּהֶם הֵימָן וִידוּתוּן חֲצֹצְרוֹת וּמְצִלְתַּיִם לְמַשְׁמִיעִים וּכְלֵי שִׁיר הָאֱלֹהִים וּבְנֵי יְדוּתוּן לַשָּׁעַר:

וַיֵּלְכוּ כָל הָעָם אִישׁ לְבֵיתוֹ וַיִּסֹּב דָּוִיד לְבָרֵךְ אֶת בֵּיתוֹ: (פ)