Exodus Chapter 40

&nbspחמישי&nbsp&nbspוַיְדַבֵּר יְהוָֹה אֶל מֹשֶׁה לֵּאמֹֽר:

בְּיוֹם הַחֹדֶשׁ הָֽרִאשׁוֹן בְּאֶחָד לַחֹדֶשׁ תָּקִים אֶת מִשְׁכַּן אֹהֶל מוֹעֵֽד:

וְשַׂמְתָּ שָׁם אֵת אֲרוֹן הָֽעֵדוּת וְסַכֹּתָ עַל הָֽאָרֹן אֶת הַפָּרֹֽכֶת:

וְהֵֽבֵאתָ אֶת הַשֻּׁלְחָן וְעָֽרַכְתָּ אֶת עֶרְכּוֹ וְהֵֽבֵאתָ אֶת הַמְּנֹרָה וְהַֽעֲלֵיתָ אֶת נֵֽרֹתֶֽיהָ:

וְנָֽתַתָּה אֶת מִזְבַּח הַזָּהָב לִקְטֹרֶת לִפְנֵי אֲרוֹן הָֽעֵדֻת וְשַׂמְתָּ אֶת מָסַךְ הַפֶּתַח לַמִּשְׁכָּֽן:

וְנָתַתָּה אֵת מִזְבַּח הָֽעֹלָה לִפְנֵי פֶּתַח מִשְׁכַּן אֹֽהֶל מוֹעֵֽד:

וְנָֽתַתָּ אֶת הַכִּיֹּר בֵּֽין אֹהֶל מוֹעֵד וּבֵין הַמִּזְבֵּחַ וְנָֽתַתָּ שָׁם מָֽיִם:

וְשַׂמְתָּ אֶת הֶֽחָצֵר סָבִיב וְנָתַתָּ אֶת מָסַךְ שַׁעַר הֶֽחָצֵֽר:

וְלָֽקַחְתָּ אֶת שֶׁמֶן הַמִּשְׁחָה וּמָֽשַׁחְתָּ אֶת הַמִּשְׁכָּן וְאֶת כָּל אֲשֶׁר בּוֹ וְקִדַּשְׁתָּ אֹתוֹ וְאֶת כָּל כֵּלָיו וְהָיָה קֹֽדֶשׁ:

וּמָֽשַׁחְתָּ אֶת מִזְבַּח הָֽעֹלָה וְאֶת כָּל כֵּלָיו וְקִדַּשְׁתָּ אֶת הַמִּזְבֵּחַ וְהָיָה הַמִּזְבֵּחַ קֹדֶשׁ קָֽדָשִֽׁים:

וּמָֽשַׁחְתָּ אֶת הַכִּיֹּר וְאֶת כַּנּוֹ וְקִדַּשְׁתָּ אֹתֽוֹ:

וְהִקְרַבְתָּ אֶֽת אַֽהֲרֹן וְאֶת בָּנָיו אֶל פֶּתַח אֹהֶל מוֹעֵד וְרָֽחַצְתָּ אֹתָם בַּמָּֽיִם:

וְהִלְבַּשְׁתָּ אֶֽת אַהֲרֹן אֵת בִּגְדֵי הַקֹּדֶשׁ וּמָֽשַׁחְתָּ אֹתוֹ וְקִדַּשְׁתָּ אֹתוֹ וְכִהֵן לִֽי:

וְאֶת בָּנָיו תַּקְרִיב וְהִלְבַּשְׁתָּ אֹתָם כֻּתֳּנֹֽת:

וּמָֽשַׁחְתָּ אֹתָם כַּֽאֲשֶׁר מָשַׁחְתָּ אֶת אֲבִיהֶם וְכִֽהֲנוּ לִי וְהָֽיְתָה לִהְיֹת לָהֶם מָשְׁחָתָם לִכְהֻנַּת עוֹלָם לְדֹֽרֹתָֽם:

וַיַּעַשׂ מֹשֶׁה כְּכֹל אֲשֶׁר צִוָּה יְהוָֹה אֹתוֹ כֵּן עָשָֽׂה: (ס)

&nbspשישי&nbsp&nbspוַיְהִי בַּחֹדֶשׁ הָֽרִאשׁוֹן בַּשָּׁנָה הַשֵּׁנִית בְּאֶחָד לַחֹדֶשׁ הוּקַם הַמִּשְׁכָּֽן:

וַיָּקֶם מֹשֶׁה אֶת הַמִּשְׁכָּן וַיִּתֵּן אֶת אֲדָנָיו וַיָּשֶׂם אֶת קְרָשָׁיו וַיִּתֵּן אֶת בְּרִיחָיו וַיָּקֶם אֶת עַמּוּדָֽיו:

וַיִּפְרֹשׂ אֶת הָאֹהֶל עַל הַמִּשְׁכָּן וַיָּשֶׂם אֶת מִכְסֵה הָאֹהֶל עָלָיו מִלְמָעְלָה כַּֽאֲשֶׁר צִוָּה יְהוָֹה אֶת מֹשֶֽׁה: (ס)

וַיִּקַּח וַיִּתֵּן אֶת הָֽעֵדֻת אֶל הָאָרֹן וַיָּשֶׂם אֶת הַבַּדִּים עַל הָֽאָרֹן וַיִּתֵּן אֶת הַכַּפֹּרֶת עַל הָֽאָרֹן מִלְמָֽעְלָה:

וַיָּבֵא אֶת הָֽאָרֹן אֶל הַמִּשְׁכָּן וַיָּשֶׂם אֵת פָּרֹכֶת הַמָּסָךְ וַיָּסֶךְ עַל אֲרוֹן הָֽעֵדוּת כַּֽאֲשֶׁר צִוָּה יְהוָֹה אֶת מֹשֶֽׁה: (ס)

וַיִּתֵּן אֶת הַשֻּׁלְחָן בְּאֹהֶל מוֹעֵד עַל יֶרֶךְ הַמִּשְׁכָּן צָפֹנָה מִחוּץ לַפָּרֹֽכֶת:

וַיַּֽעֲרֹךְ עָלָיו עֵרֶךְ לֶחֶם לִפְנֵי יְהוָֹה כַּֽאֲשֶׁר צִוָּה יְהוָֹה אֶת מֹשֶֽׁה: (ס)

וַיָּשֶׂם אֶת הַמְּנֹרָה בְּאֹהֶל מוֹעֵד נֹכַח הַשֻּׁלְחָן עַל יֶרֶךְ הַמִּשְׁכָּן נֶֽגְבָּה:

וַיַּעַל הַנֵּרֹת לִפְנֵי יְהוָֹה כַּֽאֲשֶׁר צִוָּה יְהוָֹה אֶת מֹשֶֽׁה: (ס)

וַיָּשֶׂם אֶת מִזְבַּח הַזָּהָב בְּאֹהֶל מוֹעֵד לִפְנֵי הַפָּרֹֽכֶת:

וַיַּקְטֵר עָלָיו קְטֹרֶת סַמִּים כַּֽאֲשֶׁר צִוָּה יְהוָֹה אֶת מֹשֶֽׁה: (ס)

&nbspשביעי&nbsp&nbspוַיָּשֶׂם אֶת מָסַךְ הַפֶּתַח לַמִּשְׁכָּֽן:

וְאֵת מִזְבַּח הָֽעֹלָה שָׂם פֶּתַח מִשְׁכַּן אֹֽהֶל מוֹעֵד וַיַּעַל עָלָיו אֶת הָֽעֹלָה וְאֶת הַמִּנְחָה כַּֽאֲשֶׁר צִוָּה יְהוָֹה אֶת מֹשֶֽׁה: (ס)

וַיָּשֶׂם אֶת הַכִּיֹּר בֵּין אֹהֶל מוֹעֵד וּבֵין הַמִּזְבֵּחַ וַיִּתֵּן שָׁמָּה מַיִם לְרָחְצָֽה:

וְרָֽחֲצוּ מִמֶּנּוּ מֹשֶׁה וְאַֽהֲרֹן וּבָנָיו אֶת יְדֵיהֶם וְאֶת רַגְלֵיהֶֽם:

בְּבֹאָם אֶל אֹהֶל מוֹעֵד וּבְקָרְבָתָם אֶל הַמִּזְבֵּחַ יִרְחָצוּ כַּֽאֲשֶׁר צִוָּה יְהוָֹה אֶת מֹשֶֽׁה: (ס)

וַיָּקֶם אֶת הֶֽחָצֵר סָבִיב לַמִּשְׁכָּן וְלַמִּזְבֵּחַ וַיִּתֵּן אֶת מָסַךְ שַׁעַר הֶֽחָצֵר וַיְכַל מֹשֶׁה אֶת הַמְּלָאכָֽה: (פ)

&nbspמפטיר&nbsp&nbspוַיְכַס הֶֽעָנָן אֶת אֹהֶל מוֹעֵד וּכְבוֹד יְהֹוָה מָלֵא אֶת הַמִּשְׁכָּֽן:

וְלֹֽא יָכֹל מֹשֶׁה לָבוֹא אֶל אֹהֶל מוֹעֵד כִּֽי שָׁכַן עָלָיו הֶֽעָנָן וּכְבוֹד יְהֹוָה מָלֵא אֶת הַמִּשְׁכָּֽן:

וּבְהֵֽעָלוֹת הֶֽעָנָן מֵעַל הַמִּשְׁכָּן יִסְעוּ בְּנֵי יִשְׂרָאֵל בְּכֹל מַסְעֵיהֶֽם:

וְאִם לֹא יֵֽעָלֶה הֶֽעָנָן וְלֹא יִסְעוּ עַד יוֹם הֵעָֽלֹתֽוֹ:

כִּי עֲנַן יְהֹוָה עַל הַמִּשְׁכָּן יוֹמָם וְאֵשׁ תִּהְיֶה לַיְלָה בּוֹ לְעֵינֵי כָל בֵּית יִשְׂרָאֵל בְּכָל מַסְעֵיהֶֽם: (חזק)